5 დეკემბერს, 19:00 საათზე, ილიას სახელმწიფო უნივერსიტეტის არქიტექტურის პროგრამის ორგანიზებით ილიაუნის H105 აუდიტორიაში გაიმართება საჯარო დისკუსია „მდგრადი დიზაინი კლიმატის კრიზისის ეპოქაში – საქართველოს გამოცდილება“.

დღეს კლიმატის ცვლილება სამყაროს ერთ-ერთი დიდი გამოწვევაა. დედამიწაზე სწრაფად მზარდი ტემპერატურის გამო მოსალოდნელია ექსტრემალური ბუნებრივი კატასტროფების (წყალდიდობები, გვალვები, ტყის ხანძრები და ა.შ.) გახშირება და ინტენსივობის ზრდა. ეს მოვლენები საფრთხეს უქმნის ადამიანთა სიცოცხლეს, ჯანმრთელობას, საარსებო რესურსებზე წვდომას, იწვევს მნიშვნელოვან ინფრასტრუქტურულ ზარალს.  ქვეყნები და ქალაქები ცდილობენ, შეიმუშაონ მიდგომები და სტრატეგიები კლიმატის ცვლილების ზეგავლენის შერბილების, მათთან ეფექტურად გამკლავებისა და ადაპტაციის მიზნით. ურბანულ დაგეგმარებასა და არქიტექტურას ამ პროცესში მნიშვნელოვანი წვლილის შეტანა შეუძლია. საჯარო დისკუსიაზე გარემოს დაცვის სპეციალისტები კახა ბახტაძე და სალომე დვალი ისაუბრებენ, რა სურათია საქართველოში და როგორია ურბანულ და არქიტექტურულ სფეროებში დაგროვებული გამოცდილება.

დისკუსია სტუდენტური არქიტექტურული ვორკშოპის „მდგრადი დიზაინი მწვანე სივრცეებისთვის“ საჯარო პროგრამის ნაწილია. ვორკშოპი ილიას სახელმწიფო უნივერსიტეტში 3-7 დეკემბერს გაიმართება. მისი მიზანია ურბანული მწვანე სივრცეების მოწყობისას მდგრადი გადაწყვეტებისა და თანამონაწილეობითი პრაქტიკების შესახებ ცოდნის გაღრმავება. ღონისძიების მხარდამჭერია ჰაინრიჰ ბიოლის ფონდის თბილისის ოფისი. 

სამუშაო ენა: ქართული

დრო: 5 დეკემბერი, 19:00 საათი

მისამართი: ილიას სახელმწიფო უნივერსიტეტის H105 აუდიტორია, ქ. ჩოლოყაშვილის გამზ. N3/5

დასწრება თავისუფალია.