3 დეკემბერს, 19:00 საათზე, ილიას სახელმწიფო უნივერსიტეტის არქიტექტურის პროგრამის ორგანიზებით ილიაუნის H105 აუდიტორიაში გაიმართება შვეიცარიელი ლანდშაფტის არქიტექტორის, ლუდგერ კრაბეს საჯარო ლექცია „ურბანული ცვლილებები და მდგრადი საჯარო სივრცეების მნიშვნელობა“.

მომხსენებელი განიხილავს ბაზელში დაარსებული სახელოსნოს, ბრიუმის (BRYUM), პროექტებს და ღია სივრცეებზე დაფუძნებულ ურბანული დაგეგმარების მიდგომებს, რომლებიც ადამიანების ყოველდღიურობასა და გარემოს აუმჯობესებენ.

დისკუსია სტუდენტური არქიტექტურული ვორკშოპის „მდგრადი დიზაინი მწვანე სივრცეებისთვის“ საჯარო პროგრამის ნაწილია. ვორკშოპი ილიას სახელმწიფო უნივერსიტეტში 3-7 დეკემბერს გაიმართება. მისი მიზანია ურბანული მწვანე სივრცეების მოწყობისას მდგრადი გადაწყვეტებისა და თანამონაწილეობითი პრაქტიკების შესახებ ცოდნის გაღრმავება. ღონისძიების მხარდამჭერია ჰაინრიჰ ბიოლის ფონდის თბილისის ოფისი.

მომხსენებლის შესახებ

ლანდშაფტის არქიტექტორი ლუდგერ კრაბე  2015 წლიდან კომპანია ბრიუმის (BRYUM) აღმასრულებელი მენეჯმენტის წევრია. აქვს გერმანიასა და შვეიცარიაში საჯარო და კერძო სექტორში მუშაობის 25-წლიანი გამოცდილება. ასევე არის ჩრდილო-დასავლეთ შვეიცარიის გამოყენებითი მეცნიერებებისა და ხელოვნების უნივერსიტეტის (FHNW University of Applied Sciences and Arts Northwestern Switzerland) მოწვეული ლექტორი. მისი სასწავლო კურსი მოიცავს კლიმატზე მორგებული და გაგრილებაზე ორიენტირებული ურბანული სივრცეების საკითხებს.

სამუშაო ენა: ინგლისური

დრო: 3 დეკემბერი, 19:00 საათი

მისამართი: ილიას სახელმწიფო უნივერსიტეტის H105 აუდიტორია, ქ. ჩოლოყაშვილის გამზ. N3/5

დასწრება თავისუფალია.